?Дінмұхамед Қонаев атындағы №44 мектеп-гимназиясында Ел Тәуелсіздігінің 30 жылдық мерейтойына орай “Жас мамандар” мектебінің жетекшісі Дария Уахитқызы мен жас мамандардың ұйымдастыруымен “Үлкендер жолы - ұлылық, ұрпағы жүрер ұғынып” атты кездесу кеші өтті. Кездесу кешінің басты кейіпкерлері жалпы еңбек өтілі тәуелсіздігіміздің 30 жылдығымен тұспа-тұс келген, 30 жылдай еңбек өтілі бар, шәкірттері талай додалардың биік шыңын бағындырған мектеп-гимназияның ұлағатты ұстаздары Алия Кабдрахимовна, Мая Қанатқалиқызы, Нүргүл Болатқызы, Гүлбану Маратқызы болды.
Кездесу кеші барысында ұстаздардың құрметіне әсем ән айтылып, күмбірлеген күй тартылды. 1989-1991 жылдардағы қиыншылық кезең көрінісін бейнелейтін бейнебаян көрсетілді. Сонымен қатар мектебімізде биылғы оқу жылынан бастап жұмыс жасап келе жатқан жас мамандарымыз да мәртебелі ұстаздардан үйренеріміз көп деп қатысып, ұлағатты ұстаздарға түрлі бағытта сауалдарын қойып, тұшымды жауап алды. Ұлағатты ұстаздар мен жас мамандар сол бір қиыншылық жылдардың, қазіргі кездің хит әндерін бірге шырқап, қызықты ойын ойнап, тамаша көңіл-күймен кездесу кешіне белсене қатысты.
?Әлемнің екінші ұстазы - Әл-Фараби бабамыз: “Ұстаз жаратылысынан өзіне атылғанның бәрін жете түсінген, көрген, естіген және аңғарған нәрселердің бәрін жадында жақсы сақтайтын, жаны асқақ және ар-намысын ардақтайтын, жақындарына да, жат адамдарына да әділ, жұрттың бәріне жақсылық пен ізгілік көрсетіп, қорқыныш пен жасқану дегенді білмейтін батыл, ержүрек болуы керек” - деген екен. Осындай ұлағатты ұстаздарымызға кеш соңында сый-құрмет көрсетілді. Ал кешіміздің кейіпкерлері мен директордың тәрбие ісі жөніндегі орынбасары Эльмира Набиуллақызы жас мамандардың ұстаздық жолдарына сәттілік тілеп, ақ баталарын беріп, “Жас мамандар” мектебіне алғыстарын жаудырды.
