11 желтоқсан күні Д. Қонаев атындағы 44-мектеп-гимназиясында 2-сынып оқушылары арасында “Елімнің бақытын тербеткен – Тәуелсіздік” атты тағылымды тәрбиелік шара жоғары деңгейде өтті. Шараның мақсаты:
2-сынып оқушыларына Тәуелсіздіктің тарихи маңызын терең түсіндіру, елін сүюге, ұлттық рух пен отаншылдық сезімге тәрбиелеу; жас ұрпақтың бойына мақтаныш, бірлік, жауапкершілік қасиеттерін дарытып, олардың өнері мен шығармашылығын дамыту. Салтанатты Әнұранмен басталған шара жас жүректерге қуат сыйлап, бойларына жігер дарытты.
Шара барысында оқушылар тәуелсіздіктің қадір-қасиетін ұғындырар жырларын оқып, тарихи шежірелерден сыр шерткен әсерлі қойылым көрсетті. Әнмен өрнектеліп, бимен әрленген өнерлі сәттер балалардың талантын айқын танытты. Әрбір баланың көзіндегі үміт нұры, бойындағы асқақ рух – еліміздің жарқын болашағына деген сенімді күшейткендей болды.
“Атамекен” әнін хор болып орындаған ұлдардың жігерлі үні залды толтыра жаңғырып, ұрпақты рухты, намысты ұл болуға тәрбиелейтіндей әсер қалдырды. Ал қыздар мен ұлдар билеген әсем билер — шараның сәнін келтіріп, мерекелік көңіл-күйді одан сайын асқақтатты.
Шараның шоқтығын көтерген ерекше сәт — “Көк тудың желбірегені” әнінің шырқалуы болды. Бұл кезде зал толы көрерменнің бірге қосылып айтуы мен еріксіз шапалаққа ұласқан қошеметі Тәуелсіздікке деген шынайы құрметтің айқын көрінісіндей болды. Елдік рух пен мақтанышқа толы бұл әуен бүкіл шараның мазмұнын тереңдетіп, мерекенің мәнін аша түсті.
Мерекелік жиын соңында оқушылардың жүрегінде Тәуелсіздік туралы терең ой, елге деген сүйіспеншілік, ұлттық рух пен мақтаныш сезімі қалыптасты. Белсенділік пен шынайы сезімге толы бұл күн балалар үшін де, көрермендер үшін де ерекше, есте қаларлық рухани мереке болып аяқталды.