44 мектеп-гимназиясында 28 қараша күні қазақ тілі мен әдебиеті пәні апталығының аясында 11-сынып оқушылары арасында Қазақстанның қоғамдық тарихында, әдебиетінде абыройлы орын алатын, революционер - коммунист, қазақтың белгілі жазушысы, ақын, қазақ әдебиетінің негізін салушылардың бірі Сәкен ақынға арналған "Қазақ әдебиетінің ақсұңқары – Сәкен Сейфуллин" тақырыбында оқырмандар конференциясы өтті.
Оқырмандар конференциясының басты мақсаты: Қазақ әдебиетінің алыбы Сәкен Сейфуллин шығармалары арқылы ұрпақ санасына ізгілік сезім дарыту, ой-өрісін, таным-түйсігін, көркем шығарма құндылығын көпшілікке насихаттау;
Тарихта қалған тарландар өмірі біз үшін үлгі. Қазақтың қазыналы тілінің бір пұшпағын илеген талай ақын-жазушыларымыз сөз маржанының қандай болатынын қарға тамырлы қазаққа дәлелдеп айтып кетті. Өмір атты теңізде қолдарына қалам алып дүние сырына тоймай тамсана жазған талай дана адамдар болды. Өмірге жұлдыз болып келетін, халықтың еркесі, халық жүгін көтеретін дара адамдар, дарынды жандар аз - ақ. Бірақ қазақ әдебиеті поэзия әлемінде әлемдік деңгеймен салыстырғанда XX ғасырда кенже қалған емес. Керісінше өзінше жаңа қырымен дами бастады. Әр адамның өз келбеті, өз жан - дүниесі болады.
Егер ақынға сезім мен сұлулықты, қосып берген жағдайда одан нағыз шедевр дүниелерді күтуге болады. Қазақтың маңдайына біткен Сәкен Сейфуллин дәл сондай сері адам болатын. Қазақ халқы келбетті ер адамдарды көргенде сері деген. Дәл сол сері Сәкен ақынның сұлу жанынан өріліп, талай дүниелер дүниеге келген болатын.
Оқырмандар конференциясы барысында "Қазақ әдебиетінің ақсұңқары" бөлімінде баяндама оқылып, "Сыр сандықты ашып қара..." бөлімінде Сәкен Сейфуллиннің лирикасы әңгімеленіп, "Сым пернені басып қара..." бөлімінде оқырмандар пікірі тыңдалды және мәнелеп оқу бойынша көптеген сайыс жүлдегерлері - 11 «В» сынып оқушылары Ақнажимов Беркін мен Сәлімжан Аңсағанымның өлеңдері тыңдалып, оқырмандардың құлақ құрышы қанды.
Өткізген: Шахина Л.Ғ., Сүйншева Н.Ә.
#БҚО #Оралқаласы #44мектепгимназиясы #СәкенСейфуллиншығармалары #СәкенСейфуллинлирикасыөлеңдері
