?Бүгін қазақ халқының бір туар азаматы, есімі мектеп-гимназиямызға берілген қазақ ұлтының нағыз жанашыр тұлғасы, қарапайымдылықты ту еткен Дінмұхамед Ахметұлы Қонаевтың дүниеге келген күні. 

Дінмұхамед Ахметұлы (1912-1993) - аса көрнекті мемлекет және қоғам қайраткері, кішіпейіл басшы. Өткен өмірі қаншалықты күрделі де қарама-қайшылықта болғанымен Дінмұхамед Ахметұлы экономиканы, әлеуметтік саланы, ғылымды, ұлттық мәдениетті дамыту ісінде Қазақстанның көп ұлтты халқының алдында зор еңбек сіңірді. Ол үш мәрте Социалистік Еңбек Ері атағын алып, сегіз рет Ленин орденінің және басқа да еліміз бен шет мемлекеттердің ордендері мен медальдарының иегері болды. 

✍️Ақын Күләш Ахметова бір өлеңінде:

Қазақты жамандама қазақ бала,

Қазақ деген халық қой аз-ақ қана.

Қашанда Ай астында, Жер үстінде,

Қазақтың жанашыры қазақ қана, - деп жырлайды емес пе? Осы өлең турасында айтатын болсақ, Министрлер кеңесінің төрағасы болғанда Қонаев академик атағы үшін өзіне төленетін 340 сом шамасындағы ақыдан бас тартқанын білеміз. Бұл ақшаны ол балалар мен жас ғалымдарға көмектесу мақсатында жұмсауға бұйырды. Осындай кішіпейілділік оның туа бітті қасиеті екені көзге көрініп тұрды және жұрттың оған деген сенімін күшейтті. Оның жеке басының байлық-дәулетке қызығушылығы байқалмады.

?Ұлт ұстазы Ахмет Байтұрсынұлының «Алашқа аты шыққан адамдар! Көсемдіктеріңді адаспай түзу істеңдер. Сендер адассаңдар – арттарыңнан алаш адасады, арттарыңнан ергендердің обал-сауабына сіздер қаласыздар» деген ғибратты сөзі бар. Біздіңше, Дінмұхамед Қонаев осы ұстанымды қызметтік жолында берік ұстанған жан. Себебі, атамыз өзі айтқандай, «Қанша биікке көтерілсе де туған халқынан төмен екенін ұмытқан жоқ».

Өмір өткелінде өшпес із қалдырған ұлы тұлғаның есімі мәңгі сақталмақ. Игі істері бүгінгі жастарымыз мен ертеңгі болашақ үшін зор үлгі, өнеге болып қалмақ.