Баршаңызды соңғы қоңырау мерекесімен шын жүректен құттықтаймын!
Әр мектептегі соңғы қоңырау мерекесі – бұл мектеп тарихына енетін көңілді әрі қуанышты оқиға. Түлектер өздерінің он бір жыл білім алған білім ұясымен қоштасса, ал ұстаздар өдерінің сүйікті шәкірттерін өмірге қанаттандырады.

Қымбатты оқушылар!
Елбасының «Болашаққа бағдар: рухани жаңғыру» атты мақаласында білімнің  әрдайым бірінші орында тұруы қажет екенін атап өтті.
Бүгінде Егеменді Қазақстанда сендердің сапалы білім алуларыңа барлық жағдай жасалып жатыр. «Білімді ұрпақ- тәуелсіздіктің алтын діңгегі» деп білім саласына қашан да ерекше назар аударып келеді.
Құрметті мектеп бітіруші түлектер!
Міне, бүгін қоңыраудың сыңғыры барлығымыздың жадымызда мәңгілікке жатталып қалған соңғы қоңырау салтанаты да келіп жетті. Бұл шақта – кеше ғана тұлымдары желбіреп, жүректері лүпілдеп, мектеп қабырғасын имене аттаған ұл-қыздарымыздың ойы толып, бойы өсіп, алтын ұя мектебімен қоштасады.
Қызығы мен қиыншылығы мол, әр оқу жылы қайталанбас балалықтың бал дәуренін артқа тастап, үлкен өмірге жолдама алатын аяулы кезең.Бойларыңа білім нәрін сепкен ұстаздарыңның үмітін ақтап, биіктерден көрініңіздер! Ақ жол, аяулы түлектер!
✍Құрметпен, БҚО білім басқармасының басшысы А.Мыңбаева